މިއަދު މި ފަށަނީ މުޅިން އެހެން ދިމާއަކުންނެވެ. އަމިއްލަ އޮފީހެއް ހުޅުވާ އަމިއްލަ މަސައްކަތެއް ފެއްޓުމެވެ. އަޅުގަނޑު ޢުމުރުން 23 އަހަރުން ފެށިގެން މި މަސައްކަތް ކުރީ ދައުލަތުގެ ޚިދުމަތުގައެވެ. ސިވިލް ކޯޓުގެ ޤާޟީ ކަމުން އެ ކޯޓުގެ އިސްޤާޟީ ކަމުން ހައިކޯޓުގެ ފަނޑިޔާރު ކަމުން އަދި އެންމެ ފަހުން ޕްރޮސިކިއުޓަރ ޖެނެރަލްގެ އޮފީހުންނެވެ. އެހާ ޅަ ޢުމުރުގައި ދައުލަތަށް ޚިދުމަތް ކުރަން ލިބުން އެއީ ދުނިޔެއަށް ލޯ ހުޅުވައިދިން ކަމެކެވެ. ތަފާތު ތަޖުރިބާތަކެއް ކުރަން ޖެހުނު ކަމެކެވެ. "މީހުން" އެއީ ކޮންބައެއްކަން ދަސްކޮށްދިން ކަމެކެވެ.ދައުލަތުގެ މަސައްކަތުގެ ތެރެއިން ދިމާވި ކަންކަމާއި ކުރެވުނު ތަޖުރިބާތައް ވަގުތު ލިބޭ މިންވަރަކުން ލިޔެވޭތޯ ބަލާނަމެވެ. ނިންމާފައިވާ ބައެއް މައްސަލަތައްވެސް ހިމެނޭ ގޮތުންނެވެ. އެކަމުގެ މުނާސަބު ވަގުތުގައެވެ.
އަޅުގަނޑަށް ކިޔަވަން ފުރުސަތު ލިބުނީ އިސްލާމީ ޝަރީޢަތާއި ޤާނޫނުގެ ދާއިރާއިންނެވެ. ޤާނޫނީ ދާއިރާއަކީ އަޅުގަނޑު ކުޑައިރު އެއްގޮތަކަށްވެސް ޝައުޤު ހުރި ދާއިރާއެއް ނޫނެވެ. އެހެންނަމަވެސް ނަސީބު އެ ދިމާލަށް ގެންދިޔައީއެވެ. އެ ދާއިރާއިން ކިޔަވަން ފެށުނީމާ އަދި އެއަށް ފަހު އެ ދާއިރާގައި މަސައްކަތް ކުރަން ފުރުސަތު ލިބުނީމާ މިއީ ހަމަ ކުރިއަށް ދާން ރަނގަޅު ދާއިރާއަކަށް ވިއެވެ.
ދައުލަތުގެ ރަސްމީ މަސައްކަތްތަކުން ދުރަށްގޮސް، އަޅުގަނޑު މި ފެށި އައު މަސައްކަތަކީ، ޤާނޫނީ އެހީތެރިކަން މީހުންނަށް ފޯރުކޮށްދިނުމެވެ. އަޅުގަނޑުގެ ގާތް ރަޙުމަތްތެރިއަކު އަބަދުވެސް ބުނާ ބުނުމެއް އޮވެއެވެ. ހުރިހާ ކަމެއް ކުރަން އުޅެގެން އަދި ހުރިހާ ކަމެއް ދަސްކުރަން އުޅެގެން އެއްވެސް ކަމެއް މޮޅަށް ނުކުރެވޭނެ ކަމަށް ބުނާ ބުނުމެވެ. އެ ބުނުމާއި އެއްގޮތަށް މި މަސައްކަތުގައި ކުރިއަށް ދިއުމުގައި ޚާއްސަ ކުރާނެ ދާއިރާއެއް ވިސްނުމުގައި އެބަ އޮތެވެ. އެއީ، ގޯތި ގެދޮރާއި ގުޅުން ހުރި ކަންކަމާއި، ބިމާއި ގުޅުން ހުރި ދާއިރާ އެވެ.ދެ ތިން ސަބަބެއް އޮވެގެންނެވެ. ފުރަތަމަ ސަބަބަކީ، ސިވިލް ކޯޓުގެ މަސައްކަތުގައި އަޅުގަނޑަށް މި ބާވަތުގެ މައްސަލަތައް ބެލުމުގައި އުޅެފައިވާތީ ލިބިފައިވާ ކޮންމެވެސް ވަރެއްގެ ތަޖުރިބާ އާއި ޝައުޤެވެ. ދެވަނަ ސަބަބަކީ، މިދާއިރާއަށް ޝައުޤު ހުންނަ މީހުން މަދުކަމެވެ. މި ދާއިރާގެ ކަންކަމުގައި ލިޔާނެ، ބަޙުސް ކުރާނެ މީހުން މަދުވުމެވެ. ތަރިކަބެހުމާއި، ހިބައާއި، ވަސިއްޔަތް، ބިން ބައިކުރުން، ބިން އެއްކުރުން،ލާޖެއްސުން، ރުށްގަހަށް ބަދަލު ދިނުންފަދަ ރަށްރަށުގައި ހުންނަ ބިން ބިމާއި ގުޅިގެން އުފެދޭ ޚުޞޫމާތުތަކަކީ ކޮންމެވެސް ވަރަކަށް އެކަމުގެ ފުނަށް ފީނަން ޖެހޭ ޒާތެއްގެ ޓެކްނިކަލް ކަމެއް ކަމުގައިވުމެވެ. ތިން ވަނަ ސަބަބަކީ، މި ބާވަތުގެ މައްސަލަތަކަކީ، ގިނަ ބަޔަކު ޙައްލު ކުރަން ބޭނުންވެ ޙައްލު ކުރާނެ ގޮތެއް ހޯދަންޖެހޭ ގޮތަށް އޮތް ކަމެއް ކަމަށް އަޅުގަނޑަށް ފެނުމެވެ.
އަޅުގަނޑަށް ފެނުނު އެހެން ދިމާއަކީ، މިއީ އެވެ. މި ބާވަތުގެ ކަންކަމުގެ ޤާނޫނާއި ޤަވާޢިދުތަކުގެ ފުނަށް ފީނުމެވެ. އެފަދަ ޤާނޫނާއި ޤަވާޢިދުތަކުގެ މަޢުލޫމާތު ޢާއްމުންނަށް ބުނެދެވޭތޯ ބެލުމެވެ. އެ ބާވަތުގެ ޤާނޫނުތަކުގައި ރަނގަޅު ކުރެވެން ހުރި ކަންކަމަކީ ކޮބައިކަން ހޯދުމެވެ. އަޅުގަނޑު ދެން އުޅޭނެ ދިމާއަކީ އެއީއެވެ. އެދެނީ މިކަމުގެ ހެޔޮ ތައުފީޤު މާތް ﷲ މިންވަރު ކުރެއްވުމެވެ.